Home » செய்திகள் » சொத்து பத்திரப் பதிவுக்கு புதிய கட்டுப்பாடுகள் ரத்து! தமிழக அரசின் சட்டத்திருத்தத்தை நீக்கியது உயர்நீதிமன்றம்!

சொத்து பத்திரப் பதிவுக்கு புதிய கட்டுப்பாடுகள் ரத்து! தமிழக அரசின் சட்டத்திருத்தத்தை நீக்கியது உயர்நீதிமன்றம்!

by Admin
சொத்து பத்திரப் பதிவுக்கான பிரிவு 34-சி ரத்து – உயர்நீதிமன்ற மதுரைக் கிளை அதிரடி உத்தரவு

மதுரை: அசையா சொத்து தொடர்பான ஆவணங்களைப் பதிவு செய்யும்போது முந்தைய அசல் ஆவணங்களைச் சமர்ப்பிப்பது உள்ளிட்ட பல்வேறு கட்டுப்பாடுகளை விதித்த தமிழக அரசின் பதிவு சட்டத் திருத்தத்தை, சென்னை உயர்நீதிமன்ற மதுரைக் கிளை ரத்து செய்து உத்தரவிட்டுள்ளது.

தமிழகப் பதிவு சட்டத்தில் புதிதாகச் சேர்க்கப்பட்ட பிரிவு 34-சி-க்கு எதிராகத் தாக்கல் செய்யப்பட்ட மனுக்களை விசாரித்த நீதிபதிகள் என்.சதீஷ்குமார், எம்.ஜோதிராமன் அமர்வு இந்த உத்தரவைப் பிறப்பித்துள்ளது.

என்ன கூறியது தமிழக அரசின் சட்டத்திருத்தம்?

தமிழகப் பதிவு சட்டத்தில் திருத்தம் செய்து சேர்க்கப்பட்ட பிரிவு 34-சி, கடந்த 2026 ஜனவரி 23-ம் தேதி அரசிதழில் வெளியிடப்பட்டது.

இந்தப் பிரிவின்படி, அசையா சொத்து தொடர்பான ஆவணத்தைப் பதிவு செய்யும்போது, அந்தச் சொத்தின் உரிமையைப் பெற்றதற்கான முந்தைய அசல் ஆவணத்தையும், பதிவு செய்யும் தேதிக்கு முந்தைய 10 நாட்களுக்குள் பெறப்பட்ட வில்லங்கச் சான்றிதழையும் சமர்ப்பிக்க வேண்டும் எனக் கூறப்பட்டது.

மேலும், சொத்தின் மீது அடமானம் இருந்தால் அடமானம் பெற்றவரிடமிருந்து தடையில்லாச் சான்று பெற வேண்டும் என்றும், நிறைவேற்றப்படாத விற்பனை ஒப்பந்தம் தொடர்பாக வழக்குத் தொடருவதற்கான காலவரையறை முடிவடையாத நிலையில் பதிவு செய்யக் கூடாது என்றும் நிபந்தனைகள் விதிக்கப்பட்டிருந்தன.

பூர்வீகச் சொத்துகளுக்கு முந்தைய அசல் ஆவணம் இல்லாதபட்சத்தில் பட்டா சமர்ப்பிக்க வேண்டும் என்றும், அசல் ஆவணம் தொலைந்திருந்தால் காவல்துறையின் கண்டுபிடிக்க முடியவில்லை என்ற சான்றிதழுடன் அறிவிப்பையும் சமர்ப்பிக்க வேண்டும் என்றும் சட்டத்தில் குறிப்பிடப்பட்டிருந்தது.

உயர்நீதிமன்றத்தில் வழக்கு தொடர்ந்தவர்கள்

இந்தச் சட்டத்திருத்தத்தை எதிர்த்து கொடைக்கானலைச் சேர்ந்த மனோஜ்குமார் துகார் மற்றும் அகில இந்திய ரியல் எஸ்டேட் சங்கங்களின் கூட்டமைப்பு உள்ளிட்டோர் சார்பில் உயர்நீதிமன்ற மதுரைக் கிளையில் மனுக்கள் தாக்கல் செய்யப்பட்டன.

அதில், புதிதாகச் சேர்க்கப்பட்ட பிரிவு 34-சி தன்னிச்சையானது என்றும், அரசியலமைப்புக்கு முரணானது என்றும் மனுதாரர்கள் குறிப்பிட்டனர். எனவே, இந்தச் சட்டப்பிரிவை ரத்து செய்ய வேண்டும் எனக் கோரிக்கை விடுத்தனர்.

பிரிவு 34-சி-ஐ ரத்து செய்து நீதிபதிகள் உத்தரவு

இந்த வழக்கை விசாரித்த நீதிபதிகள், பிரிவு 34-சி ஏற்கனவே நீதிமன்றங்களால் ரத்து செய்யப்பட்ட பழைய விதிகளின் மறுவடிவமாக இருப்பதாகக் குறிப்பிட்டனர்.

மேலும், அதிகாரப் பகிர்வு கோட்பாட்டை மீறுவதுடன், சொத்துப் பரிமாற்றச் சட்டத்தின் முக்கிய விதிகளுக்கும் முரணாக இந்தத் திருத்தங்கள் இருப்பதாக நீதிபதிகள் தெரிவித்தனர்.

சொத்துரிமை என்பது அரசியலமைப்பின் கீழ் பாதுகாக்கப்படும் உரிமை என்றும், ஒரு நபர் தனது சொத்தை கையாளும் உரிமையின் மீது நியாயமற்ற கட்டுப்பாடுகளை இந்தச் சட்டத்திருத்தம் விதிப்பதாகவும் நீதிபதிகள் சுட்டிக்காட்டினர்.

இதையடுத்து, தமிழகப் பதிவு சட்டத் திருத்தத்தின் மூலம் சேர்க்கப்பட்ட பிரிவு 34-சி-ஐ ரத்து செய்து நீதிபதிகள் உத்தரவிட்டனர்.

சொத்து மோசடிகளைத் தடுக்க நீதிமன்றம் முக்கியப் பரிந்துரைகள்

சட்டப்பிரிவை ரத்து செய்ததுடன், சொத்து விற்பனை மற்றும் பதிவு தொடர்பான மோசடிகளைத் தடுக்கவும் உயர்நீதிமன்றம் சில முக்கியப் பரிந்துரைகளை முன்வைத்துள்ளது.

அதன்படி, சொத்தின் முந்தைய மற்றும் தற்போதைய வில்லங்கங்கள் குறித்த துல்லியமான விவரங்கள் வாங்குபவர்களுக்குக் கிடைக்க வேண்டும் என நீதிமன்றம் தெரிவித்துள்ளது.

இதற்காக, சொத்து தொடர்பான வில்லங்கங்களின் விரிவான பட்டியலை சர்வே எண் மற்றும் கதவு எண் வாரியாகத் தயாரித்து வெளியிட வேண்டும் எனப் பதிவுத்துறை தலைவருக்கு (IG Registration) பரிந்துரைக்கப்பட்டுள்ளது.

மேலும், அனைத்து சார்பதிவாளர் அலுவலகங்களிலும் இந்தப் பணிகளை உடனடியாகத் தொடங்கி, குறிப்பிட்ட காலவரையறைக்குள் படிப்படியாக நிறைவு செய்ய வேண்டும் என்றும் அறிவுறுத்தப்பட்டுள்ளது.

வில்லங்கப் பதிவேட்டில் அனைத்து சர்வே எண்கள் தொடர்பான விவரங்களும் இடம்பெறுவதை உறுதி செய்வதுடன், அதில் உள்ள பதிவுகளின் துல்லியத்தையும் சர்வே எண் மற்றும் கதவு எண் வாரியாகச் சரிபார்க்க வேண்டும் என நீதிமன்றம் வலியுறுத்தியுள்ளது.

இந்தத் தீர்ப்பு சொத்து வாங்குபவர்கள், விற்பனையாளர்கள் மற்றும் ரியல் எஸ்டேட் துறையினரிடையே முக்கியத்துவம் பெற்றுள்ளது.

Related Articles

Leave a Comment